البرنامج بيطلّع عرض سعر احترافي لأي عميل بدقائق: الذكاء الاصطناعي بيقترح منتجات من موقعنا حسب العميل، وبعدها التعديل والطباعة، أو إرسال رابط للعميل يوافق عليه. هون الشرح كامل خطوة خطوة.
أول مرة: بتدخل بكلمة السر المؤقتة اللي وصلتك، والبرنامج بيطلب منك تختار كلمة سر جديدة إلك (8 خانات أو أكثر).
بعد كلمة السر، بيوصلك كود من 6 أرقام عالإيميل. بعد كتابته، الأفضل تضل تذكّر هالجهاز 30 يوم مأشرة على جهاز الشغل.
الكود ما وصل؟ ممكن يكون بالـ Spam، أو في كبسة ابعت كود جديد.
كلمة السر ضاعت؟ في كبسة نسيت كلمة السر؟ تحت زر الدخول. بعد كتابة الإيميل، بتوصل كلمة سر مؤقتة صالحة 30 دقيقة. كلمة السر القديمة بتضل شغالة لحد استعمال المؤقتة.
لتغيير كلمة السر أي وقت: حسابي من فوق.
🔒 كلمة السر والكود ممنوع يوصلوا لحدا. وأي كود بيوصل بدون محاولة دخول، لازم نبراس يعرف فيه.
2عرض سعر جديد
من فوق، كبسة عرض جديد (واللوغو بيرجع عالصفحة الرئيسية). الإجباري بس اسم الشركة، والمدينة ونوع النشاط اختياريين (البحث بيعبيهم). الباقي اختياري، بس كل ما زادت المعلومات، الاقتراح بيطلع أدق.
الأقسام بالفورم
معلومات العميل: المدينة، نوع السعر (سعر زبون أو سعر موزع)، عدد الموظفين، عدد العملاء، جهة الاتصال، ألوان البراند. هاي بتنحفظ مع العميل للمرة الجاية.
ملفات العميل واللوغو: إيميل العميل، طلب عرض سعر، مناقصة، صور، واللوغو.
الهدف والفئة المستهدفة: هدايا موظفين، عملاء، VIP، للبيع، معرض، مناسبة...
المنتجات المفضلة والسعر: كبسة على أي فئة مرة = مفضلة ✓، مرتين = ما بدهم ✕. وكمان مستوى السعر والميزانية (تقديرية مش ملزمة).
إعدادات العرض: العملة (ILS، USD، EUR) ولغة العرض (عربي أو English).
بعدها كبسة اقترح عرض السعر، والاقتراح بياخد تقريبا نص دقيقة. أو عرض فاضي لبناء العرض باليد.
🧹 زر ابدأ من جديد فوق بيفضّي كل الحقول. وبعد ما تطبع أو تحفظ وتطلع، الفورم بيفضى لحاله.
3العملاء المحفوظين والبحث عن الشركة
عميل قديم؟ أول حرفين من اسمه بكفوا ليطلع بالقائمة. بعد اختياره، كل معلوماته الثابتة بتتعبى لحالها (المدينة، الحجم، جهة الاتصال، الألوان، نوع السعر، اللوغو). والـ AI كمان بيشوف آخر 3 عروض بعتناها إله.
عميل جديد؟ كبسة 🔎 ابحث عن الشركة بالإنترنت، والـ AI بيدوّر عالشركة: نشاطها، حجمها، فروعها، ألوانها، وبيعبي النشاط والمدينة وألوان البراند لحاله. إذا لقى أكثر من شركة بنفس الاسم، بيطلعوا كلهم وكل وحدة جنبها هاي هي ✓.
4ملفات العميل واللوغو
سحب الملف وإفلاته على الصندوق، أو كبسة عالصندوق واختيار الملف. لحد 4MB.
سكرين شوت؟ بعد نسخه، بصفحة العرض الجديد Cmd + V (أو Ctrl + V)، وبينضاف لحاله.
اللوغو بيقبل PNG، JPG، SVG، PDF وAI، وبيطلع على العرض، والـ AI بيطلّع منه ألوان البراند.
جوا صفحة العرض، اللوغو بينسحب على العرض مباشرة.
📷 تصوير الطلب (موبايل): كبسة وحدة بتفتح الكاميرا، وصورة ورقة الطلب أو الكتالوج بتنضاف لملفات العميل، والـ AI بيقرأها. الصور الكبيرة بتصغر لحالها.
🎤 الحكي بدل الكتابة: جنب "شو المطلوب" و"خلاصة الاجتماع" في مايك. كبسة عليه، والحكي بيتحول لكتابة. ⏹ للوقف. (بيطلع بس إذا المتصفح بيدعمه، مثل كروم وسفاري.)
5اقتراح الـ AI وصفحة العرض
الـ AI بيقسّم المنتجات لأقسام، وبيكتب المقدمة والأسماء والأوصاف، وبيختار الكميات. فوق بتلاقي ملاحظة الـ AI إلك (المجموع التقريبي وأي إشي لازم تنتبهله).
التعديل
أي نص (الاسم، الوصف، المقدمة، عناوين الأقسام، الشروط): كبسة عليه وبعدها الكتابة مباشرة.
الكمية والسعر: بالخانات. الخانات الصفرا يعني المنتج بدون سعر، ولازم تتعبى قبل الطباعة.
✕ جنب أي معلومة (اللون، الكود، الطباعة، رابط المنتج) بتخبيها من العرض، و↺ بترجعها.
⠿ منه بينسحب المنتج لمكان ثاني أو قسم ثاني، أو بالأسهم ↑ ↓.
فوق: اللغة، العملة (مع سعر الصرف)، نوع السعر زبون أو موزع، وتقسيم لأقسام.
تراجع وإعادة (Cmd + Z و Shift + Cmd + Z).
عرض خيارات 🔀
لما العميل بده يختار صنف واحد من كذا بديل (مثلا مدرسة بدها 200 هدية للطلاب):
بنموذج العرض الجديد، نوع العرض: خيارات يختار منها العميل، والـ AI بيعمل أقسام خيارات لحاله.
أو بأي عرض: كبسة 🔀 خيارات جنب عنوان القسم. بيصير القسم خيارات، وبتنكتب الكمية مرة وحدة لكل الخيارات.
كل خيار بيبين سعر القطعة ومجموعه للكمية، وأقسام الخيارات ما بتدخل بالمجموع النهائي. إذا كل العرض خيارات، المجموع بيختفي وبتطلع ملاحظة إنه الأسعار غير شاملة الضريبة.
ممكن يكون بنفس العرض أكثر من قسم خيارات (طلاب ومعلمين مثلا)، وأقسام عادية كمان.
على رابط العميل، العميل بيكبس اختيار على الصنف اللي بده إياه بكل قسم، وبعدها موافق. بيوصلك إيميل فيه الخيارات المختارة.
↩ قسم عادي بترجع القسم يدخل بالمجموع.
6اقتراح ثاني
إذا المنتجات ما عجبت: كبسة ↻ اقتراح ثاني، واختيار شو ما عجب (غالية، مش مناسبة، بدي تنويع...) مع ملاحظة بالكلام، والـ AI بيفكر بطريقة ثانية.
📌 ثبّت المنتجات اللي عجبتك قبل، وبتضل زي ما هي، والـ AI بيغيّر الباقي بس.
↩ إذا القديم كان أحسن: بيطلع شريط أزرق فوق فيه ارجع للعرض القديم.
ملاحظتك بتوصل للإدارة، ومنها منحسّن البرنامج.
7إضافة وتبديل المنتجات
+ منتج من الموقع: بحث بالعربي أو الإنجليزي ("قلم معدن" أو "metal pen")، أو بالكود. وفي خيار مخزوننا بس.
تبديل جنب أي منتج: بيفتح البحث على نفس النوع.
+ صنف خارجي: منتج مش موجود عالموقع، بتكتب اسمه وسعره وبتسحب صورته.
+ قسم لقسم جديد، ولوغو العميل لتغيير اللوغو.
🧾خدمات وطباعة من خارج الموقع
بروشور، رول اب، ليبل، طباعة على مادة معينة، خدمة تصميم... أي إشي مش موجود بالموقع:
بنافذة + منتج من الموقع في تبويب 🧾 خدمات وطباعة: هاي مكتبة الخدمات اللي بيضيفها الفريق كله، وبتكبر مع الوقت.
+ خدمة جديدة بتضيف خدمة للمكتبة: الاسم، الوصف، الوحدة (قطعة، متر مربع، ساعة، مشروع...)، وطريقة التسعير:
سعر للوحدة.
حسب الكمية: مثلا من 500 قطعة بـ 1.20 ومن 1000 بـ 0.90، والسعر بيتغير لحاله مع الكمية.
مقطوع: سعر واحد للشغلة كاملة، مثل التصميم.
كبسة + خدمة أو صنف خارجي بالعرض بتضيف صنف لمرة وحدة، ومنها 💾 احفظه بالمكتبة إذا رح يتكرر.
✎ جنب أي خدمة بالمكتبة بتعدّلها. الحذف للمدير أو للي ضافها.
الـ AI كمان بيقترح من المكتبة لما يناسب (مثلا رول اب لمعرض).
8الحفظ والخروج
البرنامج بيحفظ لحاله كل كم ثانية، فما بيضيع شغلك.
بس العرض اللي بينحفظ تلقائي بيضل مسودة مؤقتة، وبينمسح لحاله بعد يومين إذا ما كبست حفظ أو طبعته أو غيرت حالته.
حفظ: بيثبّت العرض بالأرشيف. حفظ وخروج: بيحفظ وبيرجعك للأرشيف. خروج: بيطلع بدون حفظ.
الكبس على اللوغو أو أي زر فوق من جوا عرض، بيطلّع سؤال: بدك تحفظ قبل ما تطلع؟
الحالة: مسودة، انبعت، انقبل، انرفض. حدّثها دايما، لأنه منها منتابع العروض.
9تصدير PDF والطباعة
⬇ تصدير PDF: بيفتح نافذة الطباعة، ومنها Save as PDF. اسم الملف بيطلع "رقم العرض - العميل"، وروابط المنتجات بتشتغل جوا الملف.
🖨 طباعة: للطباعة على ورق.
أول طباعة أو تصدير بتعطي العرض رقم رسمي (مثلا AW-Q-2026-0012).
بعدها بيطلع تقييم صغير: قديش العرض كان مرضي، وشو ممكن يتحسن. الصراحة هون بتفرق معنا.
10رابط العرض للعميل
بدل الـ PDF، في كبسة 🔗 رابط للعميل. العرض بياخد رقم رسمي وحالته بتصير "انبعت"، وبيطلع رابط خاص:
نسخ أو 💬 واتساب مع رسالة جاهزة.
العميل بيفتحه بدون تسجيل، بيشوف العرض زي الـ PDF، وفيه: ✅ موافق على العرض، ✏️ بدي تعديل، و⬇ PDF.
أي رد بيوصلك عالإيميل فوراً، ولما يوافق الحالة بتصير "انقبل" لحالها.
بصفحة العرض بتشوف كم مرة فتح العميل الرابط وآخر مرة.
👀 أول ما العميل يفتح الرابط، كتكوت بينط وبيخبّر صاحب العرض (مرة كل 6 ساعات بالكثير). أحسن وقت للاتصال!
الرابط صالح 30 يوم. وإذا عدلت العرض وكبست حفظ، العميل بيشوف النسخة الجديدة.
📞المتابعة ومواسم الهدايا
بدها متابعة: أي عرض انبعت وما رد عليه العميل من 3 أيام، بيطلع فوق بالأرشيف، وبيطلع رقم أحمر جنب "الأرشيف". فيها كبسات 💬 واتساب و📞 اتصال (إذا رقم العميل محفوظ).
بعد المتابعة: ✓ تابعت مع ملاحظة قصيرة إذا بدك، والتذكير بيسكت 3 أيام.
كل صبح (السبت للخميس) بيوصل إيميل فيه العروض اللي بدها متابعة، والمدير بيوصله كل الفريق. وكتكوت كمان بيذكّر.
مواسم الهدايا 🎁: قبل رمضان ونهاية السنة والأضحى وبداية المدارس وعيد الأم، بتطلع بالأرشيف قائمة العملاء اللي أخدوا منا بنفس الموسم قبل، مع 📋 عرض جديد منه.
عرض لوسيط 🤝
إذا الزبون شركة دعاية أو وكيل أو مكتب تصميم: بأول نموذج العرض الجديد، 🤝 العرض لوسيط، وبعدها اسم الوسيط. العرض بينكتب باسمه، وكل المعلومات تحت عن الزبون النهائي تبعه. بالعرض بيطلع "المشروع لصالح: ..."، ومنه ✕ لإخفائه.
إرسال العرض للعميل 📧
بنافذة 🔗 رابط للعميل في رسالة جاهزة بلغة العرض باسم العميل (بتتعدل)، وكبسة واتساب لرقم العميل، و📧 ابعت إيميل بتبعث العرض من إيميل الشركة، بتوصلك نسخة، ورد العميل بيرجع لإيميلك. تلفون وإيميل العميل بينحفظوا بمعلومات العميل.
✋موافقة المدير، الصلاحية والتنبيهات
موافقة المدير ✋
عرض فيه خصم 20% أو أكثر، أو سعر أقل من سعر الموزع، أو سعر أقل من التكلفة، ما بينبعت رابطه للعميل قبل موافقة المدير.
عند 🔗 إرسال للعميل بتطلع نافذة فيها الأسباب، وملاحظة للمدير (اختياري)، وكبسة 📨 طلب موافقة المدير.
المدير بيوصله تنبيه من كتكوت وإيميل، وبيوافق أو بيرفض من جوا العرض أو من الأرشيف.
الجواب بيوصل لصاحب العرض عن طريق كتكوت والإيميل. بعد الموافقة، الإرسال بيشتغل عادي.
أي تغيير بالأسعار أو الخصم بعد الموافقة بده موافقة جديدة، والعميل بيضل يشوف آخر نسخة انوافق عليها.
الطباعة والـ PDF بتنبّه بس، وما بتمنع.
المدير بيغيّر الحدود من "الفيدباك" ← "✋ موافقة المدير".
العرض رح يخلص ⏰
صلاحية العرض بتنحسب من تاريخه والمدة المكتوبة فيه (الأساسي 30 يوم). قبل نهايتها بـ 3 أيام، العرض بيطلع بالأرشيف تحت "⏰ العرض رح يخلص"، وبإيميل الصبح، وجوا العرض نفسه. 🔄 تجديد بيخلي التاريخ اليوم، وبيحفظ، وبيمدد الرابط 30 يوم كمان. وفرصة حلوة لرسالة للعميل 😉
نفس العميل عند زميل ⚠️
إذا زميل عمل عرض لنفس الشركة آخر 14 يوم، بيطلع تنبيه تحت اسم الشركة وجوا العرض، فيه اسم الزميل ورقم العرض. أحسن ننسق قبل ما يوصل العميل عرضين مختلفين.
تقرير الأسبوع 📊 (للمدير)
كل سبت الصبح بيوصل للمدير إيميل فيه أرقام الأسبوع: عروض جديدة، انبعتت، انقبلت، انرفضت، قيمتها، نسبة القبول، أرقام كل موظف، أكثر المنتجات، شو مستني متابعة أو موافقة، وتكلفة الـ AI. نفس التقرير بيفتح من "📊 تقرير الأسبوع" بلوحة المدير.
11الأرشيف
كل عروضك، مع بحث بالعميل أو الرقم، وفلتر حسب الحالة.
الكبس على أي عرض بيفتحه. نسخ بيعمل عرض جديد من عرض قديم (ممتاز لعميل بده نفس الطلب).
الروبوت الصغير تحت عاليسار. بيسلّم عليك، بيحكيلك شو عم يعمل الـ AI، وبيحتفل معك بعد كل عرض 🎉.
كبسة عليه، وبعدها أي سؤال: كيف بعمل شغلة بالبرنامج، شو عنا منتجات (مثلا "شو عنا أقلام معدن؟")، سعر منتج، شروط التسليم والدفع، أو حتى نكتة 😄.
إذا السؤال بده قرار (خصم، سعر خاص، موافقة)، بيحكيلك تسأل نبراس.
✉️ رسالة للفريق: اكتبوا لكتكوت مثلا "ابعت لريتا حطي سعر عالطلب" أو "تعميم للكل: اجتماع الساعة 2". بيجهّز بطاقة الرسالة، وما بتنبعت إلا لما تكبسوا إرسال ✓. الرسالة بتوصل للشخص أول ما يفتح البرنامج، وكتكوت بينطّ وبيوريه إياها.
🔗 أكواد المنتجات بردود كتكوت (مثل AW9606) بتفتح صفحة المنتج بالموقع.
🧠 الذاكرة: المدير بيعلّم كتكوت معلومات عن الشركة والفريق، وكتكوت بيسأل قبل ما يحفظ أي إشي.
⚠️ كتكوت AI ومرات بيغلط. أي سعر أو معلومة لازم تنراجع قبل ما توصل للعميل.
كبسة ✕ على فقاعة الكلام بتسكّته لآخر اليوم.
13قواعد ذهبية ⭐
المسؤولية عن أي ورقة بتطلع للعميل على الموظف مش على الـ AI. الـ AI بيساعد، بس المراجعة إلنا: الأسعار، الكميات، الأسماء، والصور.
كل ما زادت معلومات العميل والهدف، ومعها خلاصة الاجتماع، الاقتراح بيصير أحسن بكثير.
المنتجات اللي سعرها صفر لسا قيد التسعير: السعر بينحط باليد، أو بنسأل نبراس.
الانتباه لـ نوع السعر مهم: سعر الموزع للموزعين بس.
حفظ للعروض المهمة، وتحديث الحالة لما العميل يرد.
أي مشكلة أو فكرة: سكرين شوت للشاشة ونبعتها لنبراس.
